"Абаймен кемел білімге" атты әдеби бульвар

6 ақпан күні Ақадыр кенттік балалар кітапханасында Ұлы ақын Абай Құнанбаевқа 175 жыл толуына орай «Абаймен кемел білімге» атты әдеби бульвар өткізілді.

Кітапхананың оқу залында «Кемел ойдың кемеңгері» атты кітап көрмесі ұйымдастырылды. Кітап көрмесіне Абай Құнанбаевтың кітаптары, қара сөздері, газет журналдардан алынған мақалалар қойылды. Көрменің жан – жағы шармен безендірілді. Ақынның үнтаспасынан «Көзімнің қарасы» атты әні жай дауыста қосылып тұрды.

Кешті жүргізуші Н. Қалижан 3 бөлімге бөліп өткізді, Абай туралы, Абай өлеңдері, Абай аудармаларына тоқтала кетті. Кеш қонақтары Балбөбек балабақшасының мектепалды даярлық тобы «Бөбек», және Ә. Ермеков атындағы орта мектептің 7 «а» сынып оқушылары қатысты.

Кеш барысында оқушылар Абайдың өлеңдерін, қарасөздерін оқыды. Жүргізуші ортада қойылған бөлме гүліне сұрақ жасырып викториналық ойын ойнатты. Балабақшаның «Бөбек» тобының бүлдіршіні Нұрлан Ә. Абайдың «Әсемпаз болма әрнеге» атты өлеңін оқып берсе, Амиров І. Абайдың «Көзімнің қарасы» әнін орындап шықты.

Кеш соңында жүргізуші: «Абай – мың қырлы, мың тәлімі бар ақын. Бүгінгі кешімізде сол мың қырының бірерін ғана өзімізше түсініп, әңгіме етпек болдық. М. Әуезовтің өзі Абай дариясының тек бетін қалқыдым десе, біз тек сол дарияның жағасына ғана келдік. Ал сол дарияның інжу – маржандары теретін болашақ ғалымдар, ақын – жазушылар сендердің іштеріңде отыр деп үміттенеміз» - деп, кешті аяқтады.